L-Għan ta' dan l-Abbozz huwa biex jimla' ċerti lakuni mportanti li l-esperjenza wriet li jeżistu fil-liġi prinċipali. L-Abbozz jagħti s-setgħa lill-Kamra li tista' timxi kontra min jippubblika reżokont mgħawweġ jew falz fil-proċeduri tagħha jew verżjonijiet mgħawwġa ħafna ta' diskorsi tal-Membri. Dawn il-pubblikazzjonijiet huma ta' preġudizzju kbir għall-interess pubbliku u għad-dinjita u prestiġju tal-Kamra u tal-Membri tagħha.

L-Abbozz jagħti s-setgħa lill-Kamra li barra milli tagħti l-pieni, li tordna l-pubblikazzjoni ta' dikjarazzjonijiet korrettivi bl-istess mezz li fih ikunu ġew ippubblikati dawk ir-reżokonti mgħawwġin jew foloz.

L-Abbozz ukoll iżid il-pieni pekunjarji li jistgħu jingħataw mill-Kamra biex dawn ikunu aktar jaqblu maż-żminijiet tal-lum.