L-għan ta’ dan l-Abbozz ta’ Liġi hu sabiex jemenda l-Att dwar l-Ippjanar tal-Iżvilupp (Kap. 552) bl-għan li jissaħħaħ il-qafas leġiżlattiv li jirregola l-użu tal-art u l-kontroll tal-iżvilupp f’Malta. L-Abbozz jintroduċi kjarifiki għal tifsir ewlieni, jaġġorna referenzi istituzzjonali u jtejjeb il-ġustizzja proċedurali, it-trasparenza u l-konsistenza fid-deċiżjonijiet tal-ippjanar. L-abbozz jagħti s-setgħa lill-Awtorità tal-Ippjanar biex toħroġ ċirkolari ta’ gwida, ittejjeb ir-regolamentazzjoni tas-sjieda u l-kunsens fl-applikazzjonijiet għall-iżvilupp, u tikkonsolida r-regoli dwar id-drittijiet vestiti, it-tiġdid tal-permessi u l-parteċipazzjoni pubblika. L-emendi proposti jirfinaw ukoll il-mekkaniżmi ta’ infurzar u r-regoli ta’ kumpens, jiċċaraw ir-revoka u l-modifika tal-permessi f’każijiet ta’ frodi jew żball materjali, u jippermettu l-applikazzjoni ta’ policies bbażati fuq kunsiderazzjonijiet speċifiċi għas-sit. Dawn ir-riformi jfittxu li jtejbu ċ-ċertezza legali u jiżguraw proċessi ta’ ppjanar aktar koerenti u effiċjenti.