L-għanijiet u r-raġunijiet ta’ dan l-Abbozz ta’ Liġi huma sabiex jiġu aġġornati d-dispożizzjonijiet tat-Taqsima III tal-Kodiċi tal-Kummerċ, Kap. 13 prinċipalment bis-sostituzzjoni tan-nomenklatura ta’ "kuratur" b’dik ta’ "trustee tal-falliment", u sabiex jiġu sostitwiti ċerti dispożizzjonijiet ta’ dak il-Kodiċi. Sabiex tiġi miżjuda l-kompetenza tal-Qorti Ċivili (Sezzjoni tal-Kummerċ). Kif ukoll sabiex jissaħħaħ il-qafas leġislattiv eżistenti dwar il-falliment u l-ħelsien mid-dejn, u sabiex parzjalment jittrasponi ċerti dispożizzjonijiet tad-Direttiva (UE) 2019/1023 tal-Parlament Ewropew u tal-Kunsill tal-20 ta’ Ġunju 2019 dwar oqfsa ta’ ristrutturar preventiv, dwar il-ħelsien mid-dejn u l-iskwalifiki, u dwar miżuri sabiex tiżdied l-effiċjenza tal-proċeduri li jikkonċernaw ir-ristrutturar, l-insolvenza u l-ħelsien mid-dejn, u li temenda d-Direttiva (UE) 2017/1132 (Direttiva dwar ir-ristrutturar u l-insolvenza).