L-għan ta’ dan l-Abbozz hu sabiex jirriforma l-liġijiet tal-kera biex jistabbilixxi ġustizzja soçjali mas-sidien ta’ proprjetà mikrija; b’mod gradat jilliberalizza l-kirjiet li saru qabel l-ewwel ta’ Ġunju, 1995, kif ukoll biex ipoġġi s-sisien li jwassal għall-suq ta’ kera li jiffunzjona sew u b’hekk jipprovdi alternattiva xierqa ghall-akkommodazzjoni adegwata u affordabbli. Id-disposizzjoni transitorja li żżomm fermi l-ordni ta’ rekwiżizzjonijiet hija magħmula suġġett għall-politika attwali tal-gvern immirata biex tneħħi għal kollox ordnijiet ta’ rekwiżizzjoni fl-iqsar żmien possibbli.