L-Abbozz dwar ir-Reġistru Ċentrali għandu l-għan li jikkonsolida f’liġi waħda d-diversi bċejjeċ ta’ leġislazzjoni li jeżistu u li għandhom x’jaqsmu mal-ħidma li ssir fir-Reġistru Pubbliku u dwar ir-Reġistrazzjoni ta’ l-Artijiet, sabiex b’hekk tiġi eliminata l-firda li teżisti bejn it-tnejn. Konformement ma’ objettiv strateġiku li għandu l-Gvern li jtejjeb is-servizz li jagħti lill-pubbliku, l-Abbozz jistabbilixxi sistema ta’ reġistrazzjoni Ċentrali ta’ darba biss għal kull ħaġa li tirrigwarda kemm il-proprjetà u l-istatus ċivili. L-Abbozz jagħti wkoll bażi legali għall-funzjonijiet imwettqa mid-Dipartiment ta’ Reġistrazzjoni Ċivili, f’dik li hi r-reġistrazzjoni ta’ l-atti u database komuni amministrata mid-Dipartiment.