L-għanijiet u r-raġunijiet ta’ dan l-Abbozz ta’ Liġi huma li tiġi msaħħa l-proċedura għall-ħatra tal-membri tat-tribunali amministrattivi u jiġu affermati l-prinċipji tal-integrità ta’ dak il-proċess billi l-ħatriet fuq tribunali amministrattivi ewlenin jibdew isiru mill-President ta’ Malta li jaġixxi fuq il-parir ta’ Kummissjoni indipendenti proposta li titwaqqaf permezz ta’ dan l-Abbozz, filwaqt illi jiżdiedu l-garanziji ta’ indipendenza u imparzjalità fl-operat tal-imsemmija tribunali. L-Abbozz jipprovdi wkoll għar-raġunijiet ta’ tneħħija mill-kariga ta’ Chairpersons u membri tat-tribunali amministrattivi u għad-dritt ta’ appell mit-tneħħija lill-Qorti tal-Appell, kif ukoll għal Kodiċi ta’ Etika għal persuni li jokkupaw l-imsemmija karigi.