L-għanijiet u r-raġunijiet ta’ dan l-Abbozz ta’ Liġi jikkonsistu fl-emenda ta’ diversi Atti dwar it-taxxi bil-ħsieb li jissaħħu l-għodod u s-setgħat investigattivi u l-għażliet għall-ftehim mal-Kummissarju għat-Taxxa u d-Dwana fil-ġlieda kontra l-evażjoni fiskali, sabiex jiġi stabbilit qafas statutorju għall-ftehim ta’ obbligi fiskali sabiex jissaħħu l-mekkaniżmi għall-irkupru ta’ ħlasijiet dovuti u b’hekk jiġu sostnuti l-isforzi usa’ tal-Istat sabiex tiġi żgurata l-effettività fil-ġbir tat-taxxi u sabiex tiskoraġġixxi reati finanzjarji. L-Abbozz ta’ Liġi jipprovdi għal ftehim barra mill-qorti fir-rigward ta’ tilwim mad-dipartimenti tat-Taxxi tal-Gvern b’mod li jinvolvi penali addizzjonali komparabbli mal-ammonti li jkunu pagabbli bħala multi fi proċeduri kriminali li jinvolvu reati finanzjarji għajr is-sanzjonijiet penali li huma imposti mid-dispożizzjonijiet tad-diversi Atti dwar it-taxxi. L-Abbozz ta’ Liġi jipprovdi wkoll għal reati kriminali ġodda li għandhom jiġu introdotti fil-Kodiċi Kriminali (Kap. 9) dwar il-ksur frodulenti ta’ ftehimiet partikolari ma’ dipartiment tal-Gvern u dwar il-ksur ta’ tali ftehimiet mingħajr raġuni ġusta u dan sabiex jipprovdi sanzjonijiet kriminali effettivi kontra l-abbuż tal-mekkaniżmu ta’ ftehim li qiegħed jiġi provdut f’dan l-Abbozz.